ഛോട്ടാബയോഗ്രഫി - 17

കൽ‌പ്പടവുകളിറങ്ങുന്നതിനിടക്ക്  ഒന്നുരുണ്ടുവീണാൽ   ഗുരുവിന്റെ മടയായി.

മുഖത്ത് എപ്പളും ഒരു സിഗരറ്റ്   കത്തുന്നുണ്ടാകും.

അന്നൊരു പുക  ചോദിച്ചു.
സിഗററ്റും  റ്ററ്റൂവാണെന്ന് പറഞ്ഞ് ഗുരുമുഖം  പൊട്ടിപ്പൊട്ടിച്ചിരിച്ചു.

ഇന്നുമതുമുഴങ്ങുന്നൂ  എന്നുടലിലെ  മലനിരകളിൽ......

ഛോട്ടാബയോഗ്രഫി- 16

ഗൂഗിളിൽ  ഭൂമിയുടെ ചിത്രത്തിനുവേണ്ടി തപ്പിനടക്കുമ്പോഴാണ്   പെൺകുട്ടിയിൽ   കണ്ണുകൾ  ഫോക്കസ്സുചെയ്തത്.

 എന്റെ നോട്ടം കണ്ട്,  മധുരമുള്ള ശബ്ദത്തിൽ   അവൾ പറഞ്ഞു :

‘ശ്രീകുമാരേട്ട, താങ്കൾ     എന്നെ വെറുതേയിങ്ങനെ  തുറിച്ചുനോക്കുന്നതെന്തിന്?.
 ഞാൻ ഈ  ചിത്രത്തിന്റെ  കേന്ദ്രബിന്ദുവല്ല.
ദൈവം എനിക്ക് ചുറ്റും  വിസ്തൃതമായ ഒരു പ്രകൃതിസൌന്ദര്യംതന്നെ ഒരുക്കിവെച്ചിരിക്കുന്നു.
താങ്കൾ അങ്ങോട്ട് കണ്ണുകളയച്ച്  എന്നെ  അപ്രസക്തയാക്കുക. മാത്രമല്ല ഈ പ്രകൃതിദൃശ്യം താങ്കൾക്ക്  ഒരു കവിതയെഴുതാനും  ഉപകരിച്ചേക്കും’.

 ഇടർച്ചയോടെ ഞാൻ  അവളോട് പറഞ്ഞു :
  ‘ ഞാൻ പറയുന്നതു നീ  കേൾക്കൂ.എന്റെ   ആത്മകഥയോടുചേർക്കാനുള്ള ഒരു ഫോട്ടോ തിരഞ്ഞുനടക്കുകയായിരുന്നു ഞാൻ. അതിനിടയിൽ  കെട്ടനെയ്യിന്റെ മണമുള്ള ഒരു വൃദ്ധൻ എതിരേ വന്നു. അയാളുടെ പല്ലുകൾ  ആയുധങ്ങളെന്നവണ്ണം  തിളങ്ങിയിരുന്നു. തുരുമ്പിച്ച  കാമബാണങ്ങളുമായി   അയാൾ നിന്നെത്തേടി നടക്കുകയാണ്. ആ ദുഷ്ടനിൽ നിന്ന്  ഞാനല്ലാതെ  നിന്നെയാരു  രക്ഷിക്കാൻ ? അതുകൊണ്ടാണ്  ഞാൻ നിന്നെത്തന്നെയിങ്ങനെ  ശ്രദ്ധിച്ചുകൊണ്ടിരിക്കുന്നത്’.

 പൊട്ടിച്ചിരിച്ചുകൊണ്ട്  അവൾ പുഴയിൽച്ചാടി നീന്തിമറഞ്ഞു.....

ഛോട്ടാബയോഗ്രഫി-15

ആകെ അറിയാവുന്ന  കർമ്മം ഇതുമാത്രം.

ബോധത്തിൽ എപ്പൊഴും പൂങ്കാറ്റടിക്കുന്നു.

 സഹജമായ തൊഴിലുകൾക്ക് ചാതുർവർണ്യത്തിന്റെ നീലക്കറ പുരണ്ട പാപമുദ്രകളുണ്ട്.

പുതിയൊരു പണി കണ്ടെത്തണം.


തേൻ തേൻ നിരന്തരമുണ്ണുന്ന യീച്ചകൾ
ഭ്രാന്തുപിടിച്ചുമരിക്കുമെന്നേ വരൂ....

 

ഛോട്ടാബയോഗ്രഫി-14

  അഴിയാക്കുരുക്കുപാതകൾ  താണ്ടി , പല പല  മോട്ടോർ ബൈക്കുകളിൽ    ഹെൽമെറ്റുകൾ ചീറിപ്പാഞ്ഞുനടക്കുന്നു.
   അതിൽ ഒരു  ഹെൽമെറ്റ്, കാണാതായ സുകുമാരക്കുറുപ്പാണ്.

 യുക്തിയും ടെക്നോളജിയും കാമുകീകാമുകന്മാരാണെന്നതിന്  ഉറച്ച   തെളിവാണ്   കുറുപ്പിനെ വെട്ടിച്ച് പാഞ്ഞുപോകുന്ന ആ  യുവമിഥുനങ്ങൾ.


1.  ഹെൽമെറ്റ്   ഈഗോ യെ കൊല്ലുന്നുവെന്ന് പറഞ്ഞാൽ വിരോധാഭാസമാകുമോ?

2.    ‘ പഴഞ്ചൻ കുട്ടൻ പിള്ള’  ബഹിരാകാശയാത്രികനായി  സയന്റിഫിക്കായത് ഹെൽമെറ്റിലൂടെയല്ലേ?

 തുടങ്ങിയ ചോദ്യങ്ങൾ നടപ്പാതയിലുള്ളവർ  ചോദിക്കും....

 
യുവമിഥുനങ്ങളെ വെട്ടിച്ച്  സുകുമാരക്കുറുപ്പ് കൂടുതൽ അദൃശ്യനാകും.

ഛോട്ടാബയോഗ്രഫി-13

ഛോട്ടാബയോഗ്രഫി-13

  പല മുറികളിൽ
പലപ്പോഴായി താമസിച്ച്
ഡിറ്റക്റ്റീവുകൾ അമ്പരപ്പിച്ച ഈ കെട്ടിടത്തിൽ
ദിനപത്രങ്ങളടുക്കിവെയ്ക്കാൻ എത്തുന്ന പെൺകുട്ടിക്ക്
ഒരു വിരൽമറയിൽ പതുങ്ങിനിൽക്കുന്ന  കുറ്റവാളിയുടെ

 പ്രേമനിർഭരമായ  ഹൃദയമിടിപ്പും  കേൾക്കാനാകുന്നു......

ഛോട്ടാബയോഗ്രഫി - 12

ഛോട്ടാബയോഗ്രഫി - 12

 ചിലങ്കകളും മുലകളും  നിതംബവും ഭൂമിയിലെ കലാസ്നേഹികൾക്ക്  പുഴുങ്ങിത്തി ന്നാനിട്ടുകൊടുത്തുകൊണ്ട് നളിനി  ഷൊർണൂർ പാസഞ്ചറിന് തലവെച്ചു.

ഭൂമിയിൽ പോസ്റ്റ് മാർട്ടം  തിമിർക്കുമ്പോൾ , കപാലമണ്ഡലം നളിനി കാലനുമുൻപിൽനൃത്തം ചെയ്തുകൊണ്ടിരിക്കുന്നു.

 ഈ  ഫോട്ടൊ  ഇങ്ങോട്ട്

  ഈ മെയിൽ ചെയ്തതാര് ?